Gefur út nýtt lag með Sjonna

Þórunn Erna Clausen, ekkja tónlistarmannsins Sjonna Brink, ætlar að gefa út lag síðar á þessu ári sem Sjonni var að vinna að þegar hann lést fyrir ári, langt fyrir aldur fram.

Lagið verður unnið í samvinnu við Vigni Snæ Vigfússon úr hljómsveitinni Vinum Sjonna. „Ég mun reyna að gera allt sem ég get til að leyfa sem flestum að njóta tónlistarinnar hans,“ segir Þórunn Erna.

Hún er þessa dagana að æfa fyrir leikritið Gulleyjuna á Akureyri. Þar gerðist skrítið atvik þegar hún kom að tölvunni sinni, sem var í eigu Sjonna, með opnu upptökuforriti þar sem prufuútgáfu af lagi hans var að finna. „Ég hafði hugsað mér að klára þetta lag en það eru svo mörg verkefni búin að vera í gangi, þannig að ég var búin að gleyma þessu. Þetta var mjög skrítið því ég hef ekki opnað þetta forrit sjálf. Hann hefur kannski verið að minna á lagið,“ segir hún og á við Sjonna.

Síðasta þriðjudag var ár liðið síðan Sjonni dó og af því tilefni ákvað Þórunn Erna að bjóða aðdáendum hans að sækja tónlist hans frítt á heimasíðu hans. „Ég fékk hugmyndina á þriðjudagsmorgni. Hann gaf alltaf svo mikið af sér sem manneskja og ég hugsaði með mér að það væri alveg í hans anda að gefa tónlistina hans.“ -fb