Þrautreyndur Gijs aldrei heyrt um Maus

„Ég vissi ekki að þeir væru til,“ segir Gijs van Veldhuizen í hollensku hljómsveitinni Maus.

Hann hefur ákveðið að breyta nafni hljómsveitarinnar, líkast til í Mauz, eftir að Biggi í Maus kvartaði yfir nafni þeirra, enda hefur hin íslenska Maus einkaréttinn á nafninu í Evrópu.

„Ég gæti hafa séð þá á Google en líklega leiddi ég þá hjá mér vegna þess að þar stóð að þeir hefðu ekki starfað í langan tíma,“ segir Gijs, sem er ekkert að æsa sig yfir nafnabreytingunni. „Þar sem Maus er nýtt verkefni hjá mér þá verður ekkert svo mikið mál að breyta nafninu. Hin hljómsveitin mín, Audiotransparent, hefur verið starfandi miklu, miklu lengur. Ég hef starfað í tónlistarbransanum í um fimmtán ár og ég veit hvers virði vörumerki getur verið. Í þessu tilfelli hefur hin íslenska Maus lagt mikið á sig til að búa til gott vörumerki.“

Gijs í Maus heldur áfram: „Biggi hafði samband við mig og lýsti yfir áhyggjum sínum af mögulegum misskilningi vegna nafnsins. Við áttum vinsamleg tölvusamskipti og það er líka gaman að kynnast nýju fólki í tónlistarbransanum.“

Eins og Fréttablaðið hefur greint frá munu Gijs og félagar spila undir nafninu Maus á hátíðinni Eurosonic í kvöld. Það verða vafalítið síðustu tónleikar þeirra undir því nafni. Gijs hefur einnig lýst yfir áhuga á að hita upp fyrir Maus ef íslenska sveitin kemur saman aftur og ítrekaði hann þann áhuga í viðtali við blaðamann.

„Biggi var nokkuð hrifinn af hugmyndinni, þannig að hver veit? Kannski munu vinaleg samskipti okkar verða til þess að við spilum í fyrsta sinn á Íslandi.“ -fb