Með tréskrúfur undir hlaupaskónum

Hlaupagarpurinn Guðmundur Guðnason brá á það ráð á dögunum að setja tréskrúfur undir hlaupaskóna sína til að geta fótað sig í hálkunni.

„Ég var búinn að leita lengi að einhverri lausn sem virkar hvort sem maður er í hálku eða á beru malbiki,“ segir Guðmundur, sem hleypur fimm daga vikunnar, sama hvernig viðrar. Samanlagt um 70 til 90 kílómetra.

„Ég sá hvernig ástandið var síðasta föstudag. Það var búin að vera glerhálka og ég ætlaði að hlaupa á laugardagsmorgun, þannig að ég græjaði þetta á föstudagskvöldið. Ég fór inn í bílskúr, fann mér tréskrúfur og skellti þeim undir gamla hlaupaskó sem ég átti og þetta svínvirkaði.“

Guðmundur setti myndir af „nýju“ hlaupaskónum sínum á Facebook og vöktu þær mikla athygli hlaupafélaga hans. „Þeir voru að forvitnast hvernig þetta hefði gengið. Einhverjir ætluðu að græja þetta strax fyrir sig.“

Ekki veitir af því enda hafa margir dottið illa í hálkunni að undanförnu, þar á meðal vinur hans sem fór út að hlaupa og rotaðist eftir að hafa runnið á hausinn. „Það er stórhættulegt oft og tíðum þetta færi, þannig að ég er ánægður með að vera kominn með einhverja lausn.“

Guðmundur vakti athygli í sumar þegar hann hljóp í kringum landið til styrktar krabbameinsveikum börnum ásamt eiginkonu sinni og tveimur öðrum. Sjálfur hleypur hann í vinnuna á hverjum morgni úr Garðabæ til Reykjavíkur og var einmitt fljótari á staðinn í gærmorgun en vinnufélagi hans sem kom akandi úr Hafnarfirðinum, enda umferðin afar hæg vegna slæmrar færðar.- fb