Úrslitaleikurinn sem aldrei verður

Þetta voru afar góðir páskar fyrir Manchester United sem sér á ný glitta í tuttugasta Englandsmeistaratitilinn eftir að liðið náði átta stiga forskoti á nágranna sína í Manchester City.

Á sama tíma og Manchester United hefur gefið í og unnið átta deildarleiki í röð hafa aðalkeppinautar þeirra aðeins unnið einn af síðustu fimm leikjum. City hefur tapað 10 stigum í þessum leikjum og farið úr því að vera með tveggja stiga forskot í það að vera átta stigum á eftir þegar sex umferðir eru eftir.

„Þeir hafa staðið sig ótrúlega vel undanfarna tvo mánuði en í fótbolta geta hlutirnir breyst fljótt. Fyrir tíu dögum vorum við einu stigi á eftir þeim en núna erum við átta stigum á eftir þeim. Hlutirnir geta líka breyst þeim í óhag. Þeir eru augljóslega með meiri reynslu en við en á meðan að það er ekki ómögulegt þá höldum við í vonina," sagði Roberto Mancini, stjóri Manchester City.

Sjálfseyðingarhvöt City-manna hefur kristallast kannski í látunum í kringum Mario Balotelli sem gulltryggði sig sem svarta sauðinn í enska boltanum með framkomu sinni á Emirates um helgina. Það tók Martin Atkinson dómara reyndar 88 mínútur að reka hann útaf en Balotelli hefði getað verið búinn að fá nokkur rauð spjöld fyrir þann tíma. Roberto Mancini gekk svo langt að segja að hann vonaðist til að leikmaðurinn sinn yrði dæmdur í langt bann.

Á sama tíma eru það reynsluboltar eins og Paul Scholes sem eru að stela sviðsljósinu hjá United. Scholes skoraði seinna mark United á móti QPR og United-liðið hefur nú náð í 34 af 36 stigum í þeim leikjum sem hann hefur tekið þátt í í deildinni í vetur. United fékk reyndar vítaspyrnu og rautt spjald á fyrirliða QPR á silfurfati þegar Ashley Young var rangstæður þegar hann fiskaði víti á Shaun Derry.

„Liðsandinn og samheldnin skín í gegn hjá okkur," sagði Sir Alex Ferguson, stjóri United og hrósaði Scholes. „Hann er búinn að vera frábær síðan hann kom aftur og hann hefur sýnt það að hann getur þetta ennþá. Hann á mikinn þátt í því sem við höfum gert undanfarnar vikur," sagði Ferguson.

Úrslitaleikurinn um titilinn er nú að breytast í leikinn sem ekkert verður úr. Manchester-liðin eiga að mætast á heimavelli City 30. apríl næstkomandi en eftir þann leik verða aðeins tvær umferðir eftir. Með sama áframhaldi lítur út fyrir að United-menn verði orðnir meistarar áður en kemur að þessum leik sem flestir fótboltaáhugamenn sáu í hillingum sem einn af hápunktum tímabilsins.