Halldóri Helgasyni boðið á heimsmeistaramótið

Íslenski snjóbrettakappinn Halldór Helgason hefur fengið boð um að taka þátt í heimsmeistaramótinu á snjóbrettum sem fram fer í Osló eftir mánuð.

Halldór er einn af fjórum sem fá sérstakt boð um að mæta án þess að hafa unnið til þess á fyrri mótum keppnistímabilsins. Aðrir þurftu að vinna sér inn keppnisrétt en vegna stöðu sinnar innan íþróttarinnar var Halldóri boðin þátttaka.

Heimsmeistaramótið er nú haldið í fyrsta sinn í langan tíma og er markmið skipuleggjenda að gera það að stærsta viðburði í brettaheiminum og er stefnt á að halda það á fjögurra ára fresti. Mótið verður allt hið glæsilegasta og fer fram í Vetrargarðinum í Osló og hinu heimsfræga Holmenkollen-skíðasvæði.

240 þáttakendur eru skráðir til leiks frá 35 löndum og búist er við að þúsundir gesta komi til Osló til þess að fylgjast með.

Keppnistímabilið er því að fara á fulla ferð hjá Halldóri en eftir tvær vikur tekur hann þátt í keppni á þeim viðburði sem í dag er talinn sá stærsti í brettaheiminum, X-Games í Bandaríkjunum.

Halldór keppir þar í risastökki, greininni sem hann sigraði öllum að óvörum fyrir tveimur árum.

Þessa dagana fer einnig fram kosning á netinu milli nokkurra keppenda á X-Games. Hver þeirra sendi inn myndband til keppninnar, sem kallast X-Games Real Snow, þar sem þeir leika listir sínar í borgarlandslagi. Sérstök dómnefnd mun síðan fara yfir myndböndin og útnefna það besta og hlýtur sigurvegarinn gullpening og 50 þúsund dollara að launum, eða rúmar sex milljónir króna.

Almenningur getur einnig valið besta myndbandið að sínu mati og sama verðlaunaupphæð í boði þar. Við hvetjum lesendur Vísis til að veita Halldóri atkvæði sitt á heimasvæði keppninnar.