Bókin Rof kom fyrst út rafrænt

„Við sjáum alls staðar að rafbókavæðingin er að sækja á,“ segir Pétur Már Ólafsson útgefandi hjá Bjarti og Veröld.

Glæpasaga Ragnars Jónassonar, Rof, er komin í sölu sem raf- og hljóðbók þrátt fyrir að hún eigi enn eftir að koma út í hinni hefðbundnu prentuðu útgáfu. Þetta sætir tíðindum hjá svona stóru forlagi en hingað til hafa bækur komið fyrst út, og jafnvel eingöngu út, í rafrænu formi hjá smærri útgáfufélögum.

Þetta skref Bjarts og Veraldar er til marks um aukinn mátt íslensku rafbókarinnar hér á landi. „Þetta mun koma en þetta gengur ekkert rosalega hratt utan enska málsvæðisins þar sem Amazon er með yfirburðastöðu. En þetta er hægt og sígandi að sækja á,“ segir Pétur Már. „Auðvitað er þetta þægilegur lestrarmáti og okkur fannst mjög spennandi að prófa þennan möguleika.“

Tilefnið var stofnun rafbókabúðarinnar eBækur og býst Pétur ekki við því að endurtaka leikinn með fleiri bækur forlagsins fyrir þessi jól.

Leikarinn Þorvaldur Davíð Kristjánsson sér um upplestur á hljóðbókinni Rof. „Hann hefur mikinn áhuga á bókum Ragnars. Þeir eru góðir félagar og hann gaf sig í þetta,“ segir hann um þátttöku Þorvaldar Davíðs. -