Betur má ef duga skal

Íþrótta- og Ólympíusamband Íslands fær samkvæmt nýju fjárlagafrumvarpi 154,2 milljónir króna til að standa að rekstri sínum á næsta ári. Undir þann hatt fellur rekstur allra sérsambanda auk þess sem ÍSÍ þarf að taka þátt í miklum kostnaði vegna ýmissa verkefna, bæði hérlendis og ytra. Framlag ríkisstjórnarinnar hækkar um tæpar sex milljónir á milli ára en Líney Rut Halldórsdóttir, framkvæmdastjóri ÍSÍ, segir að mun meira þurfi til.

„Stór hluti upphæðarinnar er eyrnamerktur fyrir sérsambönd og ýmis verkefni," segir Líney og á þar við ýmis Ólympíumót ytra sem og heilsuverkefni á Íslandi, svo sem Lífshlaupið og Kvennahlaupið. „Það sem eftir stendur fyrir rekstur ÍSÍ er um 75 milljónir. Sú upphæð þyrfti að vera nærri 100 milljónunum."

Ferðasjóðurinn minnkarTveir sjóðir á vegum ÍSÍ fá framlag frá ríkisvaldinu – ferðasjóðurinn, sem fær 52,7 milljónir og afrekssjóðurinn sem fær 34,7 milljónir. Framlag í ferðasjóð minnkar um tólf milljónir frá síðasta ári en framlag í afrekssjóðinn stendur í stað.

„Ég veit að íþróttafélög úti á landi hafa miklar áhyggjur af því að það er ekki betur hugað að ferðakostnaði því hann hefur sligandi áhrif á mörg þeirra. Sum hafa rætt um þann möguleika að draga úr ferðalögum og hætta jafnvel þátttöku í mótum vegna þess," segir Líney.

Sami styrkur í áratugFramlag í afrekssjóðinn var á síðasta ári aukið um tíu milljónir. Sjóðnum er deilt á milli þeirra íþróttamanna sem fá afreksstyrk fyrir að leggja stund á sína íþrótt. Líney segir að þrátt fyrir aukninguna í fyrra sé langur vegur frá því að sjóðurinn sé nógu stór.

„Við vitum vel að peningar leysa ekki öll vandamál en það þarf samt að hafa nóg til að geta sinnt afreksstarfinu vel. Ég tel að 100 milljónir þurfi til þess," segir Líney.

A-styrkur úr afrekssjóði nemur 160 þúsund krónum á mánuði og hefur sú upphæð ekki breyst í um áratug. Íþróttamenn geta þó aðeins notað þá upphæð til að fá endurgreiddan útlagðan kostnað við keppnis- og æfingaferðalög. Frá ÍSÍ, og þar með ríkisvaldinu, fer ekki ein króna í framfærslu afreksíþróttamanna sem þurfa að leita annað til að geta greitt fyrir húsnæði, bensín, mat og fatnað svo eitthvað sé nefnt.

„Þetta er sá veruleiki sem við búum við í dag. Auðvitað vildum við gjarnan koma til móts við aðra kostnaðarliði en bara þá sem snúa að æfingum og keppnum en það er ekki hægt í dag," segir Líney.

Til samanburðar má nefna að Skáksamband Íslands fær 20,1 milljón af næstu fjárframlögum. Launasjóður stórmeistara í skák fær 19,3 milljónir og Skákskóli Íslands 8,1 milljón. Samtals 47,5 milljónir.

Vantar launasjóð fyrir íþróttafólk„Ég er ekki hrifin af að fara í samkeppni við aðrar greinar með því að bera saman okkar kostnað og annarra. En það er til launasjóður fyrir stórmeistara í skák svo þeir geti helgað sig skáklistinni. Ég tel að svipaður launasjóður fyrir afreksmenn í íþróttum væri viðeigandi," segir Líney.

Frumvarpið fer nú í gegnum þrjár umræður á alþingi. Líney staðfestir að forráðamenn ÍSÍ vonist til að geta nýtt tímann til viðræðna við ríkisstjórnina um hærra framlag en það sem kemur fram í frumvarpinu.