Átta kátir söngvarar á ferð um Ísland

Einstaklega lífsglaður austurrískur oktett ætlar þessa vikuna að ferðast um Ísland og bjóða landsmönnum frítt á tónleika.

Strákarnir sem kynntust í menntaskóla í Salzburg hafa ferðast víða um heim og haldið tónleika, þar sem þeir blanda saman lifandi sviðsuppákomu og húmor.

„Á tónleikum reynum við að túlka tónlistina með leikrænum tilþrifum. Sum lög henta betur fyrir líkamlega tjáningu, önnur lög eru rólegri og þá skiptir stemningin öllu máli," segir Paul Durnberger, söngvari.

Oktettinn heldur ferna tónleika hér á landi. Þeir fyrstu verða í Fríkirkjunni í kvöld klukkan átta og á morgun mætir hópurinn í Norræna húsið.

„Í dag ætlum við að syngja hérna í Fríkirkjunni. Þetta verða klassísk lög í rólegri kantinum. Í Norræna húsinu mun dagskráin einkennast meira af dægurlögum,"segir Paul.

Eftir tónleikana í Reykjavík fara strákarnir út á landi og syngja og leika í Stykkishólmskirkju á þriðjudag og Akureyrarkirkju á föstudag. Athygli vekur að tónlistarveislan kostar gesti ekki krónu.

„Það sem við höfum séð nú þegar af Íslandi er stórkostlegt. Hitastigið er mun þægilegra en við héldum. Það er mjög gaman að koma til Íslands. Við fáum nokkra daga til að skoða landið, skoða jökla og eldfjöll. En fyrst ætlum við að halda tónleika og svo fara í smáfrí á Íslandi," segir hann.

Allir segjast þeir vera mjög spenntir að upplifa ævintýri hér á landi en enginn þeirra hefur komið til Íslands áður.

Á heimasíðu strákanna má fá fleiri upplýsingar um oktettinn.