Steingrímur: Koðnum ekki niður vegna þessarar samþykktar

„Það er í sjálfu sér ágætt að Evrópusambandið hafi áhyggjur af sjálfbærni fiskveiða, en þeir eiga sjálfir langt í land þar, ég geri svo sem engar athugasemdir við það," segir Steingrímur J. Sigfússon atvinnuvegaráðherra um samþykkt Evrópuþingsins um viðskiptaþvinganir gegn Íslendingum vegna makríldeilunnar svokölluðu.

Evrópuþingið samþykkti í dag að beita Íslendinga og Færeyinga viðskiptaþvingunum vegna makríldeilunnar, eftir því sem fram kemur í fréttum BBC. Íslendingar og Færeyingar hafa verið gagnrýndir harðlega á síðustu dögum fyrir of miklar veiðar úr makrílstofninum og er talið að þær séu ósjálfbærar.

Steingrímur hefur margt við þetta að athuga, hann bendir meðal annars á að rannsóknir hér á landi á markrílstofninum hafi leitt í ljós að stofninn sé að langmestu leytinu í góðu ástandi og nýttur á sjálfbærann og ábyrgan hátt.

„En þá kemur að alvöru málsins," segir Steingrímur. „Því er ekki að leyna, að síðasta þegar ég skoðaði þessar reglur, að þær myndu rúma víðtækari aðgerðir en við teljum réttar og við drögum línuna þar," bætir Steingrímur við.

„Það að blanda þessu sölu á afurðum, svo ég tali ekki um meðaflategundum eða veiðarfærum eða búnaði við þessar reglur - við myndum taka því óstinnt upp ef útfærsla aðgerðanna fari út fyrir þann ramma sem við teljum lög heimila," segir hann en í niðurstöðu þingsins segir meðal annars að þvinganirnar nái yfir aðra tegundir fiska, Steingrímur áréttar að reglurnar nái þó ekki yfir bolfisk.

Hann segir útfærsluna sem samþykkt var af þingmönnum Evrópuþingsins, ekki í samræmi við vilja harðskeyttustu afla á þinginu sem vildu ganga lengra í málinu.

Steingrímur áréttar að í reglunum sjálfum sem samþykktar voru er ekki minnst sérstaklega á Færeyjar eða Ísland. „Umfjöllun erlendra fjölmiðla eru að einhverju leyti á misskilningi byggðar hvað það varðar," segir Steingrímur. „En auðvitað vitum við til hvers refirnir eru skornir," bætir hann við.

Spurður hvort þarna sé ekki verið að neyða Ísland og Færeyjar að samningaborðinu svarar Steingrímur því til að það sé alveg ljóst að þetta muni spilla andrúmsloftinu. „Ég hef sagt það á mörgum fundum að svona lagað, eða endalausar hótanir um þetta, muni ekki gera neitt annað en að spilla andrúmsloftinu."

Steingrímur segir íslensku ríkisstjórnina mótmæla þessari samþykkt harkalega. Hann bendir á að veiðar Íslendingar séu alls ekki eina vandamálið í þessu samhengi. „Við getum auðveldlega snúið þessu við, það að Noregur og ESB úthluti sér einhliða 90 prósentum af makrílstofninum og horfa framhjá rétti Íslendinga í þessu máli er ekki réttlætanlegt," segir Steingrímur. Hann bætir við að málið verði að leysast með málefnalegum hætti við samningaborðið.

„En þeir þekkja ekki Íslendinga vel ef þeir halda að við koðnum niður við þessa samþykkt," bætir hann við að lokum.

Þó refsiaðgerðirnar hafi verið samþykktar á Evrópuþinginu er enn aðeins um tillögur að ræða. Því er ekki þar með sagt að þeim verði beitt gegn Íslendingum. Tillögurnar eiga eftir að fara fyrir ráðherraráðið sem þá þarf að samþykkja þær. Það yrði að öllum líkindum ekki gert fyrr en í október.