Óvænt brúðkaup í hádeginu - Nýbakaður eiginmaður eyðir nóttinni með skipstjóranum

Sjómaðurinn Jón Gísli Jóhannesson gekk að eiga Guðbjörgu Særúnu Björnsdóttur, unnustu sína til 33 ára, á Hofsósi í dag. Hjónavígslan var með óhefðbundnu móti en brúðurinn hafði ekki hugmynd um að stóri dagurinn hefði runnið upp.

„Eftir 33 ár gekk ég að eiga unnustu mína," segir Jón Gísli. „Hún Guðbjörg hafði gantast með þetta síðustu ár. Fyrst stakk hún upp á því að giftast þann 10.10.2010 en það hentaði ekki. Staðan var svipuð að ári liðnu, þann 11. nóvember 2011."

Jón Gísli, sem hefur fengist við smíðar undanfarið, segir það vera vita vonlaust fyrir sig að ákveða eitthvað fram í tímann. „Það kemur alltaf eitthvað upp á," segir Jón Gísli og bætir við: „Þess vegna var þetta allt ákveðið í gærkvöldi."

Jón og séra Gunnar Jóhannesson, sóknarprestur á Hofsósi, lögðu á ráðin um athöfnina í heitapottinum.

„Síðan talaði ég við dætur mínar og sagði þeim að tryggingarmaðurinn væri væntanlegur í hádeginu í dag. Daginn eftir sagði ég Guðbjörgu að ég hefði tafist aðeins út af tryggingarmanninum og að hún þyrfti að koma heim í hádeginu."

En eins og svo oft á við um metnaðarfull laumuspil, þá var á kafla tvísýnt um að markmiðinu yrði náð. Jón Gísli greip þá til örþrifaráða.

„Séra Gunnar vildi fá að koma inn á undan konunni. Þegar hún kom heim á hádegi henti ég í hana pening og sagði henni að fara út í búð. Þegar hún var komin í hvarf laumaðist séra Gunnar inn og stóð síðan í fullum skrúða þegar Guðbjörg gekk inn um dyrnar."

„Hún var náttúrulega mjög hissa," segir Jón Gísli. „Búin að bíða í öll þessi 33 ár. En það stóð ekki á svörum hjá henni."

Séra Gunnar gaf Jón Gísla og Guðbjörgu Særúnu saman í viðurvist barna þeirra. Jón Gísli segist lítið hafa hugsað um framhaldið. Hann grunar þó að áfanganum verði fagnað á næstunni. „Við erum ekki farin að hugsa um brúðkaupsferð. En það verður eitthvað gert fljótlega."

„Ég fer síðan á sjó klukkan tvö í nótt og eyði brúðkaupsnóttinni með skipstjóranum," segir Gísli að lokum