Undirbúa forvarnir gegn netfíkn barna

SAFT beinir heilræðum til barna og fullorðinna um hvernig megi komast hjá því að ánetjast tölvunni. Netfíkn barna vaxandi vandamál. Dæmi um að börn undir 18 ára spili fjárhættuspil á netinu. Foreldrar setji ekki myndir á netið.

Töluvert er um að foreldrar sem hafa áhyggjur af mikilli netnotkun barna sinna hringi í fulltrúa SAFT sem er vakningarátak um örugga notkun íslenskra barna og unglinga á netinu.

„Við sinnum ekki einstökum málum en við vísum á sálfræðinga sem foreldrar geta leitað til með börn sín. Þetta er eitt af því sem er á okkar verkefnalista, það er að miðla upplýsingum um hvert hægt er að leita,“ segir Guðberg K. Jónsson, verkefnastjóri hjá SAFT.

Fréttablaðið greindi frá því í gær að stór hópur þeirra 14 til 18 ára drengja sem væru í meðferð á göngudeild Barna- og unglingadeildar Landspítalans glímdi við netfíkn. Í alvarlegustu tilfellunum væru börnin lögð inn þar sem þau væru beinlínis í lífshættu vegna þunglyndis og vanvirkni, að sögn Guðlaugar Maríu Júlíusdóttur, verkefnastjóra félagsráðgjafar á kvenna- og barnasviði Landspítalans.

Guðberg segir netfíkn barna vera vaxandi áhyggjuefni, ekki bara á Íslandi heldur einnig hjá samstarfsaðilum SAFT í Evrópu. „Við erum að undirbúa forvarnafræðsluefni sem beint verður bæði til barna og fullorðinna með styrk frá Evrópusambandinu. Þetta verða heilræði um hvernig komast megi hjá því að ánetjast tölvunni. Við munum sinna þessu næstu tvö árin á meðan þessi áætlun er í gangi.“

Dæmi eru um að börn undir 18 ára aldri spili fjárhættuspil á netinu, að því er Guðberg greinir frá. „Við höfum heyrt dæmi um slíkt þótt þau hafi ekki komið inn á okkar borð. Forvarnirnar munu einnig ná til þessa þáttar. Flest systursamtök okkar í Evrópu leggja áherslu á að sinna þessum þáttum.“

Guðberg ráðleggur foreldrum að kynna sér netvara sem í boði eru hjá símafyrirtækjum auk forrita sem hægt er að kaupa á netinu. Hann segir jafnframt ástæðu til að vara foreldrana sjálfa við netnotkun.

„Eitt af heilræðunum sem við höfum haldið úti er að foreldrar setji ekki sumarfrísmyndir af léttklæddum börnum sínum á netið og ekki heldur texta. Við þekkjum dæmi um að myndir af íslenskum börnum hafi fundist á erlendum síðum þar sem búið er að taka þær úr samhengi. Það eru fleiri en eitt dæmi um slíkt. Myndir hafa til dæmis verið teknar af Barnalandi og settar á aðrar síður. Það er nánast ómögulegt að ná þeim þegar þær eru komnar í umferð. Það þurfa allir að fara varlega varðandi notkun netsins.“

ibs@frettabladid.is