Segir frá 50 ára grínferli

John Cleese ætlar að láta allt flakka um fimmtíu ára grínferil sinn í nýrri sjálfsævisögu sem Random House gefur út. Í bókinni ætlar hinn 72 ára Cleese að segja frá tíma sínum í Monty Python-leikhópnum og Hollywood-myndum sínum. Hann ætlar einnig að tala um fjögur hjónabönd sín. „Núna er hárréttur tími til að líta til baka á sama tíma og ég bíð spenntur eftir næstu fimmtíu árum,“ sagði Cleese. Susan Sandon hjá Random House er hæstánægð með samninginn. „Sjálfsævisögur gríngoðsagna verða ekki áhugaverðari en þessi.“