Trúlofuðu sig á Íslandi

"Ætli þetta séu ekki orðin tíu skipti,“ segir kanadíski kvikmyndaleikstjórinn Dean DeBlois þegar hann er spurður hversu oft hann hafi heimsótt Ísland. Dean er staddur hér á landi ásamt unnusta sínum, J.D. George, en þeir eru búsettir í Los Angeles, og er það í fjórða skipti sem leikstjórinn upplifir íslensk áramót. Um leið fagna þeir eins árs trúlofunarafmæli sínu, en bónorðið var borið upp eftir þriggja ára samband þann 30. desember í fyrra. "Ég bað hans á meðan við fylgdumst með mikilfenglegri norðurljósasýningu við Reykjanesvita,“ segir Dean, en hann var með hringinn í vasanum og hafði ákveðið að láta slag standa ef þeir sæju norðurljós. "Eins og staðan er núna getum við ekki gift okkur í Kaliforníu, þó við gætum það í Kanada þar sem ég er kanadískur, en við bíðum bara spakir,“ bætir Dean við, og segir að þeir geti einnig vel hugsað sér að láta pússa sig saman hér. Dean kom hingað fyrst árið 2006 eftir að hafa lengi haft brennandi áhuga á landinu vegna tónlistarinnar héðan. Í kjölfarið fór hann í samstarf með hljómsveitinni Sigur Rós en hann leikstýrði tónleikamyndinni Heima sem kom út ári síðar. Síðan þá hefur hann verið með annan fótinn hér og kann hann vel við íslensku áramótahefðirnar. "Við gerum eiginlega aldrei alveg það sama á áramótunum, og í raun höfum við ekki hugmynd um hvað við gerum í kvöld. Vanalega förum við þó í veislu hjá einhverjum vina okkar, borðum góðan mat, horfum á Áramótaskaupið og fylgjumst auðvitað með flugeldunum á miðnætti,“ en Dean skilur lítið í Áramótaskaupinu, þó hann horfi á það árlega. "Við skiljum ekki bofs, en horfum samt.“ haukur@frettabladid.is