Langaði alltaf að verða læknir

Úrslit í Elite Model Look 2012 fór fram þarsíðustu helgi í glæsilegum húsakynnum Elite á Íslandi að Ármúla. Alls komust sautján stúlkur í úrslitakeppnina af rúmlega tvö hundruð sem mættu í opnar prufur í Smáralind í byrjum september.

Lífið heyrði í sigurvegaranum, Sigurlaugu Birnu Guðmundsdóttur sem ætlaði aldrei að verða fyrirsæta, heldur læknir.

Sigurlaug mun taka þátt í Elite Model Look World í Sjanghæ í Kína í desember, þar sem sigurvegarar frá sjötíu löndum taka þátt, en stúlkurnar sem raða sér í efstu sætin þar hljóta samning við Elite World.

Æfir sig að ganga

Hvað er framundan hjá þér núna eftir að þú sigraðir Elite keppnina? "Núna mun ég bara plana hvernig ferðin verður til Shanghai og æfa mig í að ganga og svona. Þetta verður vonandi rosa gaman þarna úti. Ég mun kynnast fullt af stelpum frá öllum heiminum og læra fullt af þeim," svarar Sigurlaug.

Æfir frjálsar og spilar á píanó

"Ég fer nú fyrst alltaf í skólann og þegar ég kem heim fer ég á frjálsíþróttaæfingu eða á píanóæfingu. Þegar ég kem heim borða ég kvöldmat og fer í sturtu og læri heima og síðan horfi ég oft á sjónvarpið," segir Sigurlaug spurð hvernig ósköp venjulegur dagur er hjá henni.

Langar að verða læknir

Langaði þig alltaf að verða fyrirsæta? "Nei í rauninni hef ég aldrei ætlað mér það. Mig hefur alltaf langað að verða læknir."

Að lokum. Hvernig leggst þetta allt saman í þig - sigurinn og það sem framundan er? "Hann leggst bara vel í mig. Þetta var skrýtið fyrst. Ég meina ég hélt aldrei að ég myndi vinna," segir Sigurlaug.