Íslenskur raunveruleikaþáttur tilnefndur

Íslenski raunveruleikaþátturinn Hannað fyrir Ísland er tilnefndur til alþjóðlegu format-verðlaunanna C21 Media International Format Awards í ár.

Hannað fyrir Ísland tók fyrst þátt í samkeppni á netinu ásamt fjöldamörgum öðrum þáttum frá öllum heimshornum. Fimm vinsælustu þættirnir í hverjum flokki eftir netkosningu komust síðan í undanúrslit en Hannað fyrir Ísland keppir í tveimur flokkum af sjö. Annars vegar sem besta raunveruleikaþáttar-format með áherslu á keppni, Best Competition Reality Format, og hins vegar besta format sem drifið er áfram af tilteknu vörumerki eða vörumerkjum, Best Brand Driven Format. Í báðum flokkum keppir Hannað fyrir Ísland við tískuþáttinn Fashion Star þar sem kynnir er engin önnur en ofurfyrirsætan Elle Macpherson og dómarar söngstjarnan Jessica Simpson, athafnakonan Nicole Richie og hönnuðurinn John Varvatos.

Nefnd virtra dómara velur svo sigurvegarana og verða þeir tilkynntir við hátíðlega athöfn miðvikudaginn 10. október í Cannes í Frakklandi.

Hugtakið format nær yfir þætti sem eru með fyrirfram ákveðna uppbyggingu óháð því hvar þeir eru búnir til í heiminum. Sem dæmi um format-þætti eru American Idol, X Factor og MasterChef.

Þátturinn Hannað fyrir Ísland var framleiddur af Sagafilm og frumsýndur á Stöð 2 í mars á þessu ári. Níu hönnuðir hófu keppni í þættinum en að lokum stóð einn uppi sem sigurvegari – hin hæfileikaríka Birta Ísólfsdóttir.