Usain Bolt ætlar að verja öll gullin sín á leikunum í Ríó

Jamaíkamaðurinn Usain Bolt, heimsmetshafi í 100 og 200 metra hlaupi, er staðráðinn í því að verja Ólympíugullin eftir fjögur ár en Bolt vann þrjú gullverðlaun á leikunum í London á dögunum.

Einhver orðrómur var um að Bolt ætlaði að reyna frekar fyrir sér í langstökki á leikunum í Brasilíu árið 2016 en Usain Bolt segist ætla að mæta í sínar hefðbundnu greinar í Ríó.

„Ríó mun snúast um það að koma til að verja titlana mína. Ég hef ekki áhuga á því að prófa einhverjar nýjar greinar. Ég ætla að mæta og sýna heiminum að ég get þetta aftur og að ég get unnið þrjú gull í röð," sagði Usain Bolt.

Usain Bolt hefur unnið 100 og 200 metra hlaupið á síðustu tveimur leikum og vann einnig 4 x 100 metra hlaupið með boðshlaupssveit Jamaíka í bæði Peking og í London.

Usain Bolt er 26 ára gamall og verður því þrítugur þegar kemur að leikunum í Ríó. Enginn annar hefur unnið bæði 100 og 200 metra hlaupin á tveimur Ólympíuleikum í röð hvað þá á þremur leikum í röð.