Bjarni: Kaldar kveðjur frá Evrópuþinginu

Evrópuþingið sendi Íslendingum í dag kaldar kveðjur og hótar viðskiptaþvingunum ef við látum ekki undan í makríldeilunni, sagði Bjarni Benediktsson, formaður Sjálfstæðisflokksins, í umræðum um stefnuræðu forsætisráðherra.

„Þeirra málflutningur er sagður byggja á kröfunni um sjálfbærar veiðar. Það er líklega kominn tími til að Alþingi Íslendinga fordæmi með sérstakri ályktun ofveiðar ESB ríkjanna og gegndarlaust brottkast. Þessi slæma umgengni þeirra við fiskimið sín hefur stórskaðað hagsmuni okkar erlendis, enda hefur hegðun þessara ríkja rýrt mannorð fiskveiðiþjóða og spillt mörkuðum. Undir engum kringumstæðum verður fiskveiðihagsmunum okkar fórnað vegna hótana og bolabragða ESB," sagði Bjarni. Hann sagði jafnframt að í þessum deildum við ESB kristallaðist sú staðreynd að Íslendingar eigi ekkert erindi í aðildarviðræður við sambandið.

Bjarni sagði líka að hægt gengi í atvinnusköpun. „Hér var stefnt að sköpun fjölda starfa en þau láta á sér standa. Ef við rýnum aðeins í tölur Hagstofunnar sjáum við að það eru færri starfandi og fleiri utan vinnumarkaðar nú en á sama tíma í fyrra. Samt segir forsætisráðherra að það hafi orðið til næstum fimmþúsund ný störf á árinu. Eru þau kannski í Noregi?" spurði Bjarni.

Þá var virðing Alþingis Bjarna hugleikin. „Ég fagna umræðunni um virðingu þingsins og hlutverk, sem bæði forseti Íslands, forseti Alþingis og forsætisráðherra hafa komið inn á í gær og í dag. Upphefðin kemur ekki einungis að utan, þingmenn þurfa að umgangast starf sitt og þessa merku stofnun af virðingu og væntumþykju inn á við jafnt sem út á við. Við eigum að einbeita okkur að því að deila á málefni en ekki menn," sagði hann.