Heimskunn frá Hong Kong

Kórinn ferðast um heim allan og flytur fjölbreytta tónlist frá tíma endurreisnar til nútímans og hefur komið fram með heimsfrægum listamönnum, til dæmis hinum frábæra sellóleikara Yo-Yo Ma. Einnig hefur kórinn á þrjátíu ára ferli sínum sungið inn á fjölda geisladiska.

''Kórfélagar hafa fengið nokkra reynslu á óperusviðinu og hefur kórinn tekið þátt í óperusýningunum Carmen og Turandot við Hong Kong-óperuna árin 2005 og 2006," segir Margrét Jóhanna Pálmadóttir, aðalstjórnandi og stofnandi Stúlknakórs Reykjavíkur, sem tekur á móti hinum heimskunna Yip?s-barnakór frá Hong Kong á morgun.

Kórinn syngur í Hörpu á sunnudag milli klukkan tvö til fjögur.

"Þau verða með eina tónleikadagskrá í Hörpu og svo koma þau til okkar í þakklætisskyni og við skiljum eftir góða orku í Grensáskirkju," segir Margrét. Kórarnir sameina krafta sína við guðsþjónustu klukkan ellefu á sunnudaginn og á kveðjutónleikum í kirkjunni á þriðjudagskvöld klukkan hálf níu.

Sönglistastofnun Dr. Yip Wai-Hong í Hong Kong hefur frá árinu 1983 alið upp þúsundir tónlistarnema og er frumkvöðlastarf hans á sviði sönguppeldis vel þekkt víða um heim. Í kórnum eru rúmlega 800 nemendur og ferðast sérstakur tónleikakór um heiminn, þar á meðal hingað til lands. Í honum eru 42 söngvarar og hljóðfæraleikarar á aldrinum níu til sautján ára. Tónleikadagskrá Yip?s-kórsins er með fjölbreyttasta móti. Hún inniheldur allt frá djassi, þjóðlagatónlist og trúarlegu efni til vel valdra Broadway-söngleikjalaga og hefur verið flutt í yfir 45 löndum í sex heimsálfum frá árinu 1984.

Þetta er önnur heimsókn kórsins til landsins en Margrét var gestgjafi hans árið 1996.

"Þá söng hann og dansaði ógleymanlega á menningarnótt í Ráðhúsi Reykjavíkur," segir hún glöð. Kórnum var þá stjórnað af stofnandanum en nú stýrir Sincere Yip, dóttir hans, kórnum. Hún lauk meistaragráðu í tónlistarkennslu frá UCLA í Los Angeles árið 1982.

"Stúlknakór Reykjavíkur er einnig fjölmennur á okkar vísu og eru félagar nú um 140 á aldrinum fimm til 25 ára. Kórinn tekur inn nýjar stúlkur á hverju ári og er þeim skipt í deildir eftir aldri og getu," segir Margrét og bætir við að stofnandi Yip?s-stofnunarinnar hafi ekki átt orð yfir hreinan hljóm stúlknakórsins í fyrrnefndri heimsókn.

"Hann spurði mig hvernig ég færi að því að búa til svona fallegan hljóm og ég sagði að það væri hernaðarleyndarmál. Það er samt staðreynd að börnin mín syngja mjög hreint þó við séum ekki með svona rosasýningu né æfum fimm sinnum í viku eins og þessir krakkar en ég segi alltaf að sama hvað þið syngið þá nennir enginn að hlusta á ykkur ef það er falskt," segir Margrét kokhraust.