Kári hljóp með stein í skónum | Myndir

Kári Steinn Karlsson varð fyrir því óláni að fá steinvölu í annan skóinn sinn snemma í maraþonhlaupinu á Ólympíuleikunum í morgun.

Kári Steinn fór úr skónum skömmu áður en hann fór í viðtal hjá íslenskum fjölmiðlum að hlaupinu loknu og ætlaði að finna steininn. „Ég ætla að eiga hann sem minningargrip," sagði Kári Steinn.

Hann sagði þó að þetta hefði þó ekki hægt á sér, heldur verið óþægilegt. „Það er pirrandi og leiðinlegt að lenda í þessu og maður missir aðeins taktinn við þetta."

„Maður hugsar með sér hvers konar óheppni þetta sé en þetta blandast svo við annan sársauka sem maður finnur fyrir."

Eins og sést á meðfylgjandi myndum sem Valgarður Gíslason, ljósmyndari Vísis og Fréttablaðsins, tók sést vel á fótunum hans Kára Steins hversu mikil átök það eru fyrir líkamann að hlaupa heilt maraþon.

„Þetta er bara hluti af þessu og maður kemst aldrei hjá því að finna fyrir alls kyns óþægindum. En sem betur fer finnur maður ekki fyrir því fyrr en eftir hlaupið."