Frakkar drukku fyrir tvær og hálfa milljón króna

Þó svo Tony Parker hafi fengið glerbrot í augað síðast er hann djammaði var hann samt óhræddur við að kíkja út á lífið í London eftir að franska körfuknattleikslandsliðið lauk keppni á ÓL.

Frakkar enduðu í sjötta sæti á leikunum en þeir voru slegnir út af Spánverjum.

Parker fór með félögum sínum í landsliðinu út á galeiðuna þar sem var tekið hraustlega á því. Svo mikið reyndar að liðið drakk fyrir 2,4 milljónir króna á bar í London.

Boris Diaw, sem er nýbúinn að semja við San Antonio Spurs, greiddi reikninginn og bætti við rúmlega 200 þúsund krónum í þjórfé.

Hann ætti að hafa efni á því enda fær hann 9 milljónir dollara fyrir tvö ár hjá Spurs.