Bogfimikona kom út úr skápnum á Ólymíuleikunum

Karen Hultzer, bogfimikona frá Suður-Afríku, vonar að koma hennar úr skápnum á Ólympíuleikunum í London hjálpi fólki sem efist um kynhneigð sína og hjálpi til í baráttunni gegn fordómum í garð samkynhneigðra.

Hultzer er ein 23 opinberlega samkynhneigðra íþróttamanna á Ólympíuleikunum. Hún beið þar til þátttöku hennar á leikunum lauk með að tilkynna samkynhneigð sína.

„Ég vona að þetta gefi fólki kjark. Því meir sem við ræðum opinskátt um hlutina ætti fólki að verða ljóst að samkynhneigð er eðlilegur hlutur," sagði Hultzer sem hafnaði í 46. sæti af 64 keppendum í bogfimi.

Samkvæmt samantekt OutSports.com eru aðeins 23 samkynhneigðir íþróttamenn í London en þar af eru aðeins þrír karlmenn. Það er umtalsvert færri en í Peking 2008 (10) og Aþenu 2004 (11).

Af þeim 104 opinberlega samkynhneigðu íþróttamönnum sem tekið hafa þátt í Ólympíuleikum hafa flestir verið frá Bandaríkjunum eða 27. Flestir hafa verið knattspyrnuiðkendur.