Klinsmann gagnrýnir þýska landsliðið: Yfirspilaðir af Ítölum

Þjóðverjar voru mættir á EM til að verða Evrópumeistarar en urðu að sætta sig við tap í undanúrslitunum á móti Ítölum í gær. Þýskaland hefur ekki unnið titil á stórmóti síðan að Jürgen Klinsmann var fyrirliði liðsins á EM 1996. Hann var gestur BBC í útsendingunni frá leiknum í gær.

„Þetta er lið framtíðarinnar hjá Þýskalandi en í kvöld sáum við þá hlaupa á vegg," sagði Jürgen Klinsmann á BBC. Mario Balotelli kom Ítalíu í 2-0 og mark Mesut Özil úr vítaspyrnu í uppbótartíma kom alltof seint.

„Þýska liðið átti ekki möguleika á móti Ítalíu því þeir töpuðu öllum einvígunum á miðjunni. Þeir réðu ekki við Andrea Pirlo, Riccardo Montolivo eða Daniele De Rossi," sagði Klinsmann.

„Ítalir yfirspiluðu þýska liðið í fyrri hálfleik og Ítalir voru síðan frábærir í seinni hálfleiknum. Ítalska liðið á allt hrós skilið því þeir voru verðugir sigurvegarar," sagði Klinsmann en hann var þjálfari þýska liðsins áður en Joachim Löw tók við.