Þrjár borgir eftir í baráttunni um ÓL 2020

Framkvæmdastjórn Alþjóðaólympíusambandsins (IOC) hefur staðfest að Doha og Bakú koma ekki lengur til greina sem gestgjafar Ólympíuleikanna árið 2020.

Doha, höfuðbork Katars, og Bakú í Aserbaídsjan höfðu lagt fram boð um að fá leikana en þau gerðu slíkt hið sama fyrir leikana 2016. Var þeim einnig hafnað af framkvæmdastjórninni þá.

Eftir standa því þrjár borgir - Istanbúl í Tyrklandi, Tókýó og Madríd. Nú fer í gang mikil kosningabarátta þessara þriggja borga en kosið verður á milli þeirra þann 7. september á næsta ári.

Ólympíuleikarnir voru haldnir í Tókýó árið 1964 en hafa aldrei farið fram í Istanbúl eða Madríd. Síðastnefnda borgin er nú að sækja um að fá leikana í þriðja skiptið í röð, Tókýó annað skiptið í röð og Istanbúl í fimmta sinn alls.