Innkaupalistinn hjá Chelsea | Roman ætlar að eyða 50 milljörðum

Roman Abramovich, eigandi Chelsea, gerir sér fulla grein fyrir því að hann þarf að endurnýja leikmannahópinn hjá Chelsea fyrir næsta tímabil. Daily Mail slær því upp að rússneski eigandinn sé tilbúinn í að eyða 247 milljónum punda í nýja leikmenn í sumar en það gera um 50 milljarðar íslenskra króna.

Roman telur brýna þörf á því að finna leikmenn í fjórar stöður - stöðu framherja, báðar bakverðastöðurnar og stöðu sóknartengiliðs. Hann þarf samt að byrja á því að ráða stjóra en gott gengi liðsins undir stjórn Roberto Di Matteo gæti orðið til þess að Di Matteo fái fastráðningu.

Abramovich hefur með hjálp njósnara sinna sett saman innkaupalista með þeim mönnum sem Chelsea mun reyna að kaupa í sumar en efstur á þeim lista er Tottenham-maðurinn Luka Modric. Didier Drogba, Salomon Kalou og Florent Malouda eru allir að klára sinn samning og verða væntanlega ekki áfram á Stamford Bridge.

Það er ekki nóg að með Chelsea ætti að reyna við þessa átta leikmenn sem eru nefndir til sögunnar hér fyrir neðan því félagið hefur einnig augastað á þeim Radamel Falcao, framherja Atletico Madrid, Ezequiel Lavezzi miðjumanni Napoli og Jan Vertonghen varnarmanni Ajax. Það fylgir síðan sögunni að svo gæti farið að David Luiz verði seldur til Barcelona.

Chelsea á enn möguleika á því að vinna Meistaradeildina og enska bikarinn. Liðið er þó aðeins í sjötta sæti í ensku deildinni og gæti því misst af Meistaradeildarsæti nema að Chelsea-menn fari alla leið og vinni bara Meistaradeildina.

Innkaupalisti Chelsea í sumar:

Luka Modric, miðjumaður, Tottenham

Gonzalo Higuain, sóknarmaður, Real Madrid

Mario Götze, miðjumaður, Borussia Dortmund

Edison Cavani, sóknarmaður, Napoli

Hulk, sóknarmaður, Porto

Alvaro Pereira, varnarmaður, Porto

Cesar Azpilicueta, varnarmaður Marseille

Eden Hazard, miðjumaður, Lille