Félagið Kolvetni stofnað um olíuvinnslu á Drekanum

Aðaleigandi BYKO, Verkfræðistofan Mannvit og helsti sérfræðingur Norðmanna um Jan Mayen-hrygginn eru meðal stofnenda íslensks olíuleitarfélags sem ætlar að sækja um Drekasvæðið í samstarfi við fjársterkt erlent olíufélag. Markmiðið er að byggja upp íslenskan olíuiðnað.

Kolvetni var skráð sem einkahlutafélag í dag um olíuleit og vinnslu. Stjórnina skipa Gunnlaugur Jónsson formaður, Haukur Óskarsson frá Mannviti og Norðmaðurinn Terje Hagevang en eigendur eru Gunnlaugur, Jón Helgi Guðmundsson í BYKO, Terje Hagevang og Verkfræðistofan Mannvit. Þeir Gunnlaugur og Jón Helgi eru hluthafar í breska olíuleitarfélaginu Valiant og einnig kanadíska félaginu Athabasca Oil Sands og áttu áður í norska félaginu Sagex, sem sameinaðist Valiant í fyrra.

Þátttaka jarðfræðingsins Terje Hagevangs í íslenska félaginu gefur því mikinn styrk en hann hóf rannsóknir á olíujarðfræði Jan Mayen-svæðisins fyrir meira en þrjátíu árum og hefur áætlað að það geymi álíka miklar olíu- og gaslindir og Noregshaf. Terje stýrði áður Sagex og er nú forstjóri Noregsdeildar Valiant-olíufélagsins.

Gunnlaugur segir í viðtali í fréttum Stöðvar 2 að markmiðið sé að Íslendingar byggi upp eigin olíuiðnað. Það hafi reynst Norðmönnum mikil blessun að hafa fundið olíu hjá sér og menn voni að slíkt gerist einnig á Íslandi. Hann segir Verkfræðistofuna Mannvit hafa einna mesta þekkingu á olíugeiranum á Íslandi, bæði hvað varðar jarðfræðina og virðiskeðjuna og þá þjónustu sem þurfi í landi.

„Við höldum að Íslendingar eigi að taka beinan þátt í þessu, en ekki bara vera með erlend olíufyrirtæki sem koma og sækja olíuna og borga síðan bara skattinn. Þannig við við viljum byggja sem mest upp á Íslandi," segir Gunnlaugur.

Hann kveðst ekki mega gefa upp að sinni hvaða erlent olíufélag verður í samstarfi við Kolvetni ehf. um Drekaumsókn á mánudag en segir það gott og traust félag með reynslu af olíuleit. Það framleiði einnig olíu og sé fjárhagslega sterkt.