M.I.A. gaf Bandaríkjamönnum fingurinn - NBC biðst afsökunar

Forsvarsmenn NBC hafa beðist afsökunar á því að hafa ekki verið nógu snöggir að hylja miðfingur söngkonunnar M.I.A. sem rappaði í lagi Madonnu, Give Me All Your Luvin, í auglýsingahléinu á Ofurskálinni síðastliðna nótt.

Einhverjum Bandaríkjamönnum var verulega brugðið eftir að breska tónlistarkonan M.I.A. gaf áhorfendum fingurinn auk þess sem hún sagði í texta sínum að henni væri skítsama. Eða: „I don´t give a shit".

Þetta fór verulega fyrir brjóstið á áhorfendum, allavega miðað við viðbrögð NBC sjónvarpstöðarinnar. Þeir reyndu að vísu að hylja fingurinn en voru of seinir. Á vef The Daily Mail segir að tæknilegir örðugleikar hefðu leitt til þess að fingurinn fékk að njóta sín í beinni.

Sumir Bandaríkjamenn eru líklega ekki enn búnir að jafna sig á hneykslinu þegar Janet Jackson flaggaði geirvörtunni í beinni árið 2004 þegar hún tók lagið ásamt Justin Timberlake. Því voru þeir nokkuð viðkvæmir fyrir fingrinum.

Ekki er ljóst hvort M.I.A. taki atvikið nærri sér. Sjálf er hún rammpólitísk í list sinni og hefur oft verið gagnrýnd fyrir. Þá ólst hún meðal annars upp í norðu-hluta Sri Lanka þar sem Tamíl tígrar réðu lögum og lofum á tíunda áratugnum. Faðir hennar var pólitískur andófsmaður sem barðist fyrir aðskilnaði Sri Lanka og tamíla en fjölskyldan þurfti meðal annars að fara í felur vegna stjórnarhers Sri Lanka. Hún virðist því ekki kalla allt ömmu sína.

M.I.A. var hinsvegar að gefa út nýtt lag og má sjá myndbandið hér. Hún er vel þekkt í Bretlandi og víðar og sló í gegn á heimsvísu þegar tónlist hennar var notuð í kvikmyndinni Slumdog Millionare.