Missti ösku Kim Jong-Il yfir Seacrest á rauða dreglinum

Leikarinn Sacha Baron Cohen hellti ösku Kim Jong-Il yfir einn frægasta kynni veraldar, Ryan Seacrest, þegar hann ræddi við hann á rauða dreglinum. Cohen mætti í gervi einræðisherrans, en kvikmynd um einræðisherrann verður frumsýnd von bráðar. Einræðisherrann var með krús fulla af ösku sem hann sagði vera ösku Kim Jong-Il á rauða dreglinum, og sagði að það hefði verið síðasta ósk hins nýlátna einræðisherra Norður-Kóreu að fá að ganga rauða dregilinn - en Kim Jong-Il var mikill kvikmyndaáhugamaður.

Þegar Seacrest spurði einræðisherrann í hvaða fötum hann væri, svaraði hann því til að John Galliano hefði hannað einkennisbúninginn. Sá hönnuður komst síðast í fréttirnar fyrir að vera hallur undir nasisma.

Það kom svo Seacrest í opna skjöldu þegar einræðisherrann missir ösku Kim Jong-Il yfir smóking Seacrest. Í kjölfarið kom öryggisvörður og fjarlægði einræðisherrann. Eftir stóð Seracrest hundfúll yfir gríninu.

Forsvarsmenn Óskarsverðlaunanna ætluðu í fyrstu að banna Cohen að koma á verðlaunin af ótta við grín af þessum toga. Með semingi leyfðu þeir honum að mæta á hátíðina. Raunar sló persóna hans í gegn síðar um kvöldið. Þannig stóð gamanleikkonan Tina Fey í biðröð ásamt öðrum stjörnum eftir að því að fá að mynda sig með ösku Kim Jong-Il.

Hægt er að horfa á myndbandið, þar sem Seacrest fær öskuna yfir sig, hér fyrir ofan.