Átti tvo vini í skóla

Hin 19 ára gamla söng- og leikkona Selena Gomez virðist svo sannarlega hafa heiminn að fótum sér. Ekki nóg með að hún sé falleg, klár, hæfileikarík og að því er virðist, fullkomin, heldur er hún líka kærastan hans Justin Bieber. Hún segist þó aldrei hafa verið vinsæl í skóla og ekki hafa haft mikið sjálfstraust.

„Ég átti tvo vini á skólaárunum. Ég sat alltaf aftast í kennslustofunni og einbeitti mér bara að náminu,“ sagði Gomez í nýlegu viðtali. Hún segir að sér hafi þó aldrei verið strítt eða hún lögð í einelti, en hún þakkar það frænku sinni sem var mjög vinsæl í skólanum og ein af aðal klappstýrunum.

Áður en Selena byrjaði með Justin Bieber var hún heldur ekki svo heppin í ástum. Hún segir í viðtalinu að hún hafi orðið skotin í einum strák þegar hún var í skóla en þar sem hún hafði ekki kjark í að tala við hann brá hún á það ráð að forðast hann eins og heitan eldinn.

Eflaust sjá margir skólafélaga Selenu eftir því í dag að hafa ekki vingast við hana á meðan þeir höfðu tækifæri til.