Voru skíthræddir um að bardaginn yrði blásinn af

"Ég var að drepast úr stressi yfir að ég væri búinn að eyðileggja allt fyrir Gunna," segir Jón Viðar Arnþórsson, formaður bardagaklúbbsins Mjölnis. "Þetta er samt svo fyndið því hann hefur aldrei áður fengið skurð í andlitið."

Eins og alþjóð veit fór Gunnar Nelson létt með andstæðing sinn þegar hann þreytti frumraun sína í blönduðum bardagalistum innan UFC-sambandsins á laugardaginn var.

Glöggir áhorfendur tóku eftir því að það blæddi úr skurði á höku Gunnars eftir bardagann, án þess þó að andstæðingurinn, DaMarques Johnson, hefði komið einu einasta höggi á hann.

Skurðinn fékk Gunnar þegar hann tók létta æfingu með Jóni Viðari á miðvikudeginum fyrir bardagann. Samkvæmt reglum UFC mega keppendur ekki vera með skurð í andliti þegar í bardagann er komið.

"Við vorum að kickboxa létt á miðvikudeginum fyrir bardagann eins og við gerum oft. Við höfum æft saman í tíu ár og aldrei slasað hvor annan. Svo gerðist þetta. Ég sparkaði í hann, fyrir stærstu stund lífs okkar þegar við vorum að passa okkur sérstaklega mikið," segir Jón Viðar, en hann kynnti íþróttina fyrir Gunnari fyrir nokkrum árum.

Félagarnir voru að vonum stressaðir um að bardaginn yrði blásinn af en að auki voru um hundrað og fimmtíu Íslendingar á leiðinni til Nottingham til að sjá bardagann.

"Við klemmdum strax fyrir og Gunni er með svo þykkt blóð að það hætti að blæða mjög fljótlega. Okkur var ráðlagt að fara ekki til læknis, því hann mátti ekki keppa með sauma. Daginn eftir skoðaði UFC-læknirinn hann og gaf honum grænt ljós," segir Jón Viðar.

"Hann leit alveg þokkalega út daginn eftir en við vorum samt alveg skíthræddir."

Þegar Gunnar var við upphitun nokkrum mínútum fyrir bardagann opnaðist skurðurinn svo aftur.

"Gunni og John Kavanagh, yfirþjálfari Mjölnis, voru að glíma á bak við og með smá nuddi opnaðist skurðurinn. Hann gekk inn í búrið skömmu síðar og þegar bardaginn hófst byrjaði að blæða. Við vorum bara heppnir að þetta var á góðum stað eða undir hökunni. Ef þetta hefði verið í kringum augun hefðu dómararnir aldrei leyft honum að slást. Það hjálpaði líka að hann er með skegg svo þetta sást illa," segir Jón Viðar, en sauma þurfti fjögur spor í höku Gunnars eftir sparkið óheppilega.

hallfridur@frettabladid.is