Arnaldur ánægður með nýja útgáfu

„Þetta er náttúrulega frábært að fá þessa bók út á þýsku og það verður gaman að vita hvernig henni vegnar,“ segir metsöluhöfundurinn Arnaldur Indriðason.

Á sunnudaginn verður mikið húllumhæ í sendiráði norrænu landanna í Berlín þegar 79 af stöðinni eftir föður Arnaldar, Indriða G. Þorsteinsson, kemur í fyrsta skipti út á þýsku. Dagskráin er hluti af heiðursgestahlutverki Íslands á bókamessunni í Frankfurt. Að sögn Halldórs Guðmundssonar, verkefnisstjóra Sögueyjunnar Ísland, er mikill áhugi á þessum atburði, öll sæti eru frátekin enda les einn þekkasti leikari Þjóðverja, Joachim Król, upp úr bókinni. Król þessi lék meðal annars aðalhlutverkið í þýsku metsölumyndinni Hlauptu Lola, hlauptu. 79 af stöðinni er hluti af þríleik Indriða um þær samfélagsbreytingar sem áttu sér stað í kjölfar kreppunnar og hernámsins. Bókin kom fyrst út árið 1955 en þríleikurinn var gefinn út í einu riti árið 2004.

Fjölskyldutengslin við Arnald hafa eflaust heldur ekki skemmt fyrir. Íslenski rithöfundurinn hefur verið í fremstu fylkingu í útrás íslensku glæpasögunnar og nýtur töluverðrar hylli meðal þýskra reyfara-áhugafólks. Arnaldur á hins vegar ekki heimangengt á upplesturinn í Berlín.- fgg