Prikið undirbýr drykkjuspil í tilefni afmælis

Veitinga- og skemmtistaðurinn Prikið er með nýtt borðspil í undirbúningi í tilefni af sextugsafmæli sínu í ár.

„Við ætlum að búa til fyllerísspil í anda Trivial [Pursuit]. Þarna verður fullt af hlutum sem tengjast Prikinu og vitleysunni sem er í gangi þar," segir Finni hjá Prikinu. „Þetta verður fjör, númer eitt, tvö og þrjú. Það verður mikið drukkið í því, býst ég við."

Steinþór Steingrímsson og Ölvir Gíslason, mennirnir á bak við hið vinsæla spil Spurt að leikslokum, hafa verið fengnir til að sjá um spilið.

Að sögn Finna ætlar Prikið að vera með eitthvað skemmtilegt í gangi í hverjum einasta mánuði í tilefni afmælisins. Ein hugmyndin er að fá eldra fólk til að vinna á barnum í einn dag og einnig að halda dag þar sem eldri borgarar koma fyrri partinn í köku og kaffi og yngra fólk mætir síðan seinni partinn í partí.

Prikið býður upp á fría fimmtudaga einu sinni í mánuði í janúar, febrúar og mars, eins og undanfarin ár. Þá eru í boði ókeypis hamborgarar, franskar og kók á meðan birgðir endast. Þetta ómótstæðilega tilboð hófst klukkan 11 í dag.

„Mig minnir að við höfum gert 380 hamborgara í fyrra á þremur tímum. Þetta er bara stuð og brjálað að gera en skilyrði er að fólkið sem mætir sé kurteist," segir Finni. -fb