Ekki spennt fyrir eigin brúðkaupi

Söngkonan Jessica Simpson trúlofaðist unnusta sínum, fyrrum íþróttamanninum Eric Johnson, eftir aðeins sex mánaða samband. Parið hefur þó ekki ákveðið brúðkaupsdaginn sjálfan og er það farið að valda Johnson áhyggjum.

In Touch heldur því fram að Simpson vilji ekki ana út í hlutina heldur taka þeim með ró. „Hún vinnur mikið og ferðast nánast vikulega og er þess vegna ekki jafn spennt fyrir brúðkaupinu og áður,“ var haft eftir vini söngkonunnar sem sagði önnur vandamál einnig hrjá parið. „Hún var mjög hrifin af Eric áður en þau eru saman alla daga og það er farið að fara í taugarnar á henni. Núna þegar brúðkaupið ber á góma er hún fljót að skipta um umræðuefni.“