Vill leika í grínmynd

Bretinn Colin Firth, sem vann Óskarsverðlaunin fyrir hlutverk sitt í The King"s Speech, hefur mikinn áhuga á að leika í gamanmynd á næstunni. „Mig langar að leika í einhverri mynd sem fær mig til að hlæja og er í öðrum dúr en það sem ég hef gert að undanförnu. Þannig get ég haldið áfram að gera mig að fífli," sagði Firth, sem hefur getið sér gott orð fyrir gamanleik í Bridget Jones myndunum.

Næstu myndir hans verða þó af öðrum toga. Næst sést hann í Tinker, Tailor, Soldier, Spy, sem er endurgerð gamallar njósnamyndar um kalda stríðið. Þar leikur hann breskan leyniþjónustumann sem er sakaður um að leka upplýsingum til Sovétmanna.

Stutt er í að tökur hefjist á annarri mynd, Gambit, sem er endurgerð myndar frá 1966 með Michael Caine í aðalhlutverki. Í endurgerðinni leikur Firth á móti Cameron Diaz og hefjast tökur í maí. Handritshöfundar eru Joel og Ethan Coen. Firth hefur einnig verið orðaður við myndina Stoker, þar sem Nicole Kidman myndi leika á móti honum. Orðrómur um þriðju Bridget Jones myndina hefur einnig verið uppi að undanförnu.