Depp vill í Disneyland

Það er ekki alltaf tekið út með sældinni að vera frægur. Johnny Depp þráir fátt heitar en að geta verið óþekktur í heilan dag svo hann geti farið óáreittur með börnin sín í Disneyland. Leikarinn segir að frægðin komi oft í veg fyrir að hann geti gert hversdagslega hluti með börnunum sínum tveimur, Lily-Rose og Jack, sem eru tólf og níu ára og þekkja því ekki annað en að eiga frægan pabba.

„Ef ég væri óþekktur myndi ég rölta í gegnum Disneyland og fara í öll tækin með börnunum mínum, leyfa þeim að upplifa það. Venjulega, þegar pabbi þeirra fer með þeim í Disney-garðinn er upplifunin ekki svo eðlileg,“ segir Depp sem segist alltaf hafa átt erfitt með athyglina sem fylgir starfinu.