Menningarvitar á Facebook vilja menningarfréttir á RÚV

„1. desember var sýnt fram á að skapandi greinar eru með umsvif á við sjómenn og bændur samanlagt og það er bara synd að RÚV skuli ekki sinna þessum hluta nægjanlega vel,“ segir Hallgrímur Helgason rithöfundur.

Hann skorar á listamenn að fylla pósthólfið hjá Páli Magnússyni útvarpsstjóra og Sigrúnu Stefánsdóttur dagskrárstjóra með áskorun um að koma á fót sérstökum menningarfréttum með svipuðu sniði og íþróttafréttir hafa verið.

Hallgrímur segir þessa hugmynd ekki vera nýja af nálinni. „Þetta viðraði Benedikt Erlingsson í haust og í framhaldi af því sendi ég þennan póst til útvarpsstjóra og dagskrárstjóra en fékk ekkert svar. Ég heyrði svo Katrínu Jakobs­dóttur menningamálaráðherra segja að menningarfréttir mættu vera meiri og betri og ákvað að láta kné fylgja kviði.“

Hallgrímur hefur stofnað sérstaka grúppu á Facebook undir nafninu Menningarfréttir í útvarp og sjónvarp og þar er hægt að nálgast bréf Hallgríms.

Meðal þess sem þar kemur fram er að dagskrárstjórinn og útvarpsstjórinn myndu „skora feitt hjá þjóðinni með því að innleiða MENNINGAR­FRÉTTIR við hlið Íþróttafrétta í lok hvers fréttatíma“. - fgg