15 hlutir sem þú vissir ekki um Sjálfstætt fólk

Sjálfstætt fólk, þáttur Jóns Ársæls Þórðarsonar og Steingríms Jóns Þórðarsonar, er tilnefndur til Edduverðlauna í áttunda skipti í ár. Þrisvar sinnum hafa þeir félagar hreppt verðlaunin í flokki frétta- eða viðtalsþátta.

Mörgum finnst þeir eflaust þekkja Jón Ársæl persónulega af skjánum og flestir vita líklega að þátturinn heitir eftir bók Halldórs Laxness. En það er ýmislegt sem fólk veit ekki um sálfræðinginn og fréttamanninn Jón Ársæl og kvikmyndatökumanninn og framleiðandann Steingrím Jón.

1.

Jón Ársæll eyðir öllum sínum frítíma við smíðar á gömlum bóndabæ sem hann á undir Eyjafjöllum. Hann er nokkuð lunkinn með hamarinn og er enn með alla puttana í lagi þó svo að hann hitti ekki alltaf naglann á höfuðið.

2.

Steingrímur á tvo íslandsmeistara í samkvæmisdönsum, þær Hörpu og Perlu og eiginkona hans, Lind Einarsdóttir er snillingur í matargerð. Sjálfur vann Steingrímur tvistkeppni á árum áður og átti lengi vel íslandsmet í bekkpressu.

3.

Jón á ekki GSM síma og sonur hans Þórarinn Ingi Jónsson hefur setið í fangelsi í Kanada fyrir list sína. Hann er nú laus úr fanghelsi og stundar framhaldsnám í myndlist í Prag.

4.

Steingrímur vakir yfirleitt aðfaranótt föstudags við klippingu á þættinum.

5.

Báðir elska nautakjöt og Jón Ársæll er með réttindi sem matreiðslumaður á skipum.

6.

Hvorugur borðar grænmeti í óhófi og Steingrímur alls ekki banana.

7.

Síðustu kisurnar sem Jón Ársæll átti hétu ,,Póstur" og ,, Sími".

8.

Uppáhaldsstaður Jóns Ársæls í veröldinni er Ægissíðan en Steingrímur elskar París.

9.

Það sem Jón tæki með á eyðieyju væri bruggtæki.

Steingrímur tæki hins vegar bát.

10.

Jón var í sveit í Sleðbrjótsseli í Jökulsárhlíð og var talinn fljótasti smalinn í sveitinni. Hlaupanáttúru sína þakkar hann því að hafa verið látinn eta reykt selkjöt í alla mata og saltað selspik bæði ofan á brauð og út á fisk ásamt sellýsi.

11.

Steingrímur, sem er hagfræðingur að mennt hefur dvalið í Uzbekistan og Afganistan og Jón Ársæll bjó um árabil í Vestur-Afríku þar sem hann vann við rannsóknir í sálarfræði.

12.

Félagarnir hafa unnið á fjórða hundrað þætti bæði heiman og heima og segjast vera aðeins rétt að byrja. Hver maður hefur sína sögu að segja og það eina sem til þarf er að hlusta, já og að elska viðmælandann. Best er reyndar að sofa hjá honum, en eins og Freud gamli sagði þá úðar einstaklingurinn út frá sér leyndarmálum sínum.

13.

Það versta sem þeir hafa lent í við framleiðslu þáttanna er þegar Barði í Bang Gang heimtaði að hann yrði aldrei sýndur hlæjandi, það passaði ekki við ímyndina,en hann hló út í eitt við þáttagerðina.

14.

Síðan móðgaðist viðmælandi í eitt sinn við fyrstu spurningu þegar búið var að ferðast yfir hálfan hnöttinn, en sem betur fór náðust samningar um að halda áfram.

15.

Að lokum. Sú manneskja sem félagarnir myndu helst vilja fá viðtal við er Jesú frá Nazaret en þeir Jón Ársæll eru fæddir sama dag, þ.e. 16. september. Ómar Ragnarsson er víst búinn að reikna þetta allt saman út en hann á reyndar sama afmælisdag.