Retro Stefson að semja við útgáfurisann Universal

Hljómsveitin Retro Stefson er í þann mund að skrifa undir samning við stórfyrirtækið Universal. Viðræður fóru af stað eftir að útsendari fyrirtækisins í Þýskalandi fór á tónleika með hljómsveitinni á Iceland Airwaves-hátíðinni síðasta haust og heillaðist upp úr skónum.

Samkvæmt heimildum Fréttablaðsins eiga liðsmenn Retro Stefson enn eftir að undirrita samninginn en líklegt er að það gangi í gegn á næstu dögum. Hvorki Unnsteinn Manúel Stefánsson úr Retro Stefson né Grímur Atlason, umboðsmaður sveitarinnar og framkvæmdastjóri Iceland Airwaves, vildu tjá sig um samninginn þegar Fréttablaðið hafði samband við þá. Unnsteinn staðfesti þó að von væri á fréttatilkynningu á næstu dögum.

Retro Stefson hefur lengi verið talin ein efnilegasta hljómsveit landsins. Hún hefur gefið út tvær plötur á ferli sínum, nú síðast Kimbabwe sem féll í mjög góðan jarðveg. Hún fékk fjórar stjörnur hér í Fréttablaðinu og lenti í þriðja sæti hjá sérfræðingum blaðsins yfir bestu plötur síðasta árs. Umræddur samningur snýst um útgáfu Kimbabwe á erlendri grundu.

Stutt er síðan Retro Stefson spilaði á bransahátíðinni Eurosonic í Hollandi. Í umfjöllun þýskrar heimasíðu tónlistartímaritsins Rolling Stone um hátíðina var minnst á hljómsveitina sem eina af þeim sem væru líklegar til að slá í gegn á næstunni.

freyr@frettabladid.is

Hér fyrir ofan má sjá myndband við lagið Kimba sem var tekið upp í tengslum við Inspired by Iceland-herferðina síðasta sumar.