Brennuvargar ollu milljóna tjóni í Eyjum

Lögreglan í Vestmannaeyjum leiltar nú brennuvarga, sem ollu milljóna tjóni með því að kveikja í síldarnót, sem stóð á athafnasvæði netaverkstæðisins Ísnets, en viðlíka nót kostar 50 til 60 milljónir króna.

Eldsins varð vart upp úr klukkan tíu í gærkvöldi og var allt slökkviliðið í Eyjum sent á vettvang ásamt slökkvibíl ofan af flugvelli. Slökkviliðsmönnum tókst að koma í veg fyrir að eldurinn bærist í fleiri veiðarfæri eða mannvirki, en skaðlegan reyk lagði frá eldinum á meðan hann logaði.

Ljóst er að nótin er stór skemmd og telur lögreglan fullvíst, í ljósi aðstæðna, að kveikt hafi verið í nótinni af einbeittum ásetningi, því nótin var blaut eftir rigningar. Hún var í eigu Ísfélagsins og notuð um borð í Álsey VE.