Penn og Jean verða vinir

Bandaríski leikarinn Sean Penn og tónlistarmaðurinn Wyclef Jean hafa ákveðið að grafa stríðsöxina og snúa bökum saman til að hjálpa íbúum Haítí. Penn og Jean sinnaðist illilega í fjölmiðlum þegar leikarinn gagnrýndi rapparann harðlega fyrir forsetaframboð sitt á Haítí en íbúar eyjunnar búa við mikinn skort á mat og öðrum nauðsynjavörum eftir að jarðskjálfti lagði landið nánast í rúst í fyrra. Jean svaraði þessum ásökunum og sagði Penn ekkert annað en gamlan dóphaus en bandaríski leikarinn hefur eytt öllum sínum frítíma á Haítí við hjálparstörf.

Félagarnir hittust fyrir tilviljun á tónleikum hljómsveitarinnar T-Vice í New York um helgina samkvæmt slúðurdálki New York Post. Að sögn sjónarvotta virtist andrúmsloftið vera rafmagnað þegar þeir komu augu hvor á annan en síðan báðu þeir starfsfólk sitt um að finna laust herbergi handa sér. Þeir lokuðu að sér og ræddu saman í hálftíma. „Þetta voru engin öskur eða læti, þeir hreinsuðu bara loftið milli sín," hefur New York Post eftir heimildarmanni sínum.