Hjúkrunarfræðingar vísa kjaradeilu til ríkissáttasemjara

Félag íslenskra hjúkrunarfræðinga vísaði í dag kjarasamningaviðræðum sínum við Fjármálaráðherra f.h. ríkissjóðs til sáttameðferðar hjá ríkissáttasemjara. Viðræðuáætlun var undirrituð í október í fyrra af viðræðuaðilum þar sem gert var ráð fyrir samningslokum fyrir nóvemberlok.

Samningsaðilar hafa fundað reglulega frá 2. desember 2010 án nokkurs árangurs og þolinmæði samningarnefndar hjúkrunarfræðinga er nú þrotin að því er fram kemur í tilkynningu. Á aðalfundi sem haldinn var 19 maí síðastliðinn var samninganefnd félagsins hvött til að kanna grundvöll og hug félagsmanna til aðgerða eins og yfirvinnubanns eða verkfalls.