Charlie Sheen drekkur eins og svín

Síðasta helgi hjá Charlie Sheen virðist hafa verið með villtara móti eftir því sem bandarískir og breskir fjölmiðlar kafa dýpra ofan í sukksama veröld bandaríska leikarans. Hann var staddur í Las Vegas um helgina, sem er kannski ekki í frásögur færandi, nema ef vera kynni fyrir þá staðreynd að Charlie var viðstaddur stærstu klámmyndahátíð heims, AVN-Adult Entertainment Expo. Charlie kaus líka að hella sér af alvöru í sukk og stóðlífi, hellti í sig hverri vodkaflöskunni af fætur annarri á milli þess sem hann bauð klámmyndastjörnum í partí.

Að sögn sjónarvotta var það nánast ótrúlegt að horfa á drykkju Charlie milli þess sem hann skjallaði hina ljóshærðu fullorðinsmyndastjörnu Bree Olson upp úr skónum. Þrátt fyrir að þau tvö væru augljóslega nokkuð skotin þá hurfu þau ekki einsömul upp á hótelherbergi heldur bauð Bree tveimur starfssystrum sínum úr fullorðinsbransanum með sér. Samkvæmt The Sun ku Sheen þó vera hrifinn af Bree, hann flaug meðal annars til heimabæjar hennar í Indiana um jólin og hitti hana þar.

Charlie Sheen er án nokkurs vafa ein mesta sukkpadda Hollywood og hefur margsinnis komist í kast við lögin vegna drykkjuskapar og óláta. Samkvæmt heimildum vefsíðunnar TMZ mætti Charlie hins vegar eldhress í tökur á sjónvarpsþættinum Two and a Half Men eftir allt bílífið og lék og lét eins og ekkert hefði í skorist. „Hann virðist geta drukkið ótæpilegt magn af áfengi, hann er óseðjandi,“ hefur TMZ eftir heimildarmanni sínum á tökustað.