Íslenskur framleiðandi sópar til sín stjörnum

Eva Maria Daniels, íslenskur kvikmyndaframleiðandi í Hollywood, hefur fengið Veru Farmiga til að leika aðalhlutverkið í kvikmynd sinni, Goats. Farmiga var tilnefnd til Óskarsverðlauna fyrir tveimur árum en hún þótti fara á kostum í Jason Reitman myndinni Up in the Air. Hún hefur þar að auki leikið í kvikmyndum á borð við The Departed.

Eva Maria hefur jafnframt klófest X-Files leikarann David Duchovny og Will Arnett auk Minnie Driver sem er þekkt fyrir leik sinn í Grosse Pointe Blank, Good Will Hunting og fjölda annarra mynda.

Upphaflega stóð til að Rooney Mara færi með aðalhlutverkið í Goats en hún var síðar ráðin til að leika tölvuhakkarann Lisbeth Salander í amerísku útgáfunni af bókum Stieg Larsson. Hún neyddist því til að segja sig frá myndinni vegna anna á öðrum vígstöðvum enda er fastlega búist við því að Karlar sem hati konur verði einn af smellum þessa árs. Þá stóð jafnframt til að Kevin Kline yrði meðal leikara en hann er einnig horfinn á braut.

Það vakti mikla athygli þegar Fréttablaðið greindi frá því að Eva Maria væri einn af framleiðendum kvikmyndarinnar Romantics sem skartaði Katie Holmes, eiginkonu Tom Cruise, í aðalhlutverki.

Eva Maria hafði áður unnið með Sigur Rósar piltunum og getið sér gott orð fyrir störf innan kvikmyndageirans í London áður en hún settist að í Hollywood.- fgg