Í hlutverki Saddams

Sacha Baron Cohen ætlar að leika Saddam Hussein, fyrrverandi Íraksforeta, í gamanmyndinni The Dictator. Myndin er byggð á bókinni Zabibah and The King sem Hussein skrifaði sjálfur.

„Þessi mynd fjallar um hetjulega sögu einræðisherra sem hætti lífi sínu til að tryggja að lýðræði kæmi aldrei til landsins sem hann beitti harðræði af svo mikilli ástríðu,“ segir í laufléttri yfirlýsingu framleiðandans Paramount. Cohen, sem er þekktur fyrir persónur á borð við Borat og Brüno, er einn af handritshöfunum myndarinnar, sem er væntanleg í bíó í maí 2012.

Cohen hefur fleiri járn í eldinum. Hann er þessa dagana að leika í nýjustu mynd Martins Scorsese, Hugo Cabret, sem kemur út í desember, auk þess sem hann á að leika Freddie Mercury, söngvara Queen, í nýrri mynd um ævi hans sem kemur til sýninga á næsta ári.