Edduverðlaunastytturnar komu brotnar til landsins

„Ég get staðfest að flutningurinn á styttunum tókst ekki sem skyldi," segir Hilmar Sigurðsson, formaður Íslensku kvikmynda- og sjónvarpsakademíunnar.

Nánast allar Edduverðlaunastytturnar voru brotnar þegar þær komu til landsins á dögunum. Stytturnar eru 23 og samkvæmt upplýsingum Fréttablaðsins sluppu aðeins fjórar þegar þær ferðuðust þessa rúmlega 7.800 kílómetra leið frá Kína til Íslands.

Hilmar segir að einhvers staðar á leiðinni hafi þeim verið umpakkað frá því að þær voru sendar úr málmsteypuverksmiðjunni og að ekki hafi verið gengið nógu vel frá þeim. „Mér skilst að flutningafyrirtækið hafi gert það til þægindaauka - þær eru mjög þungar," segir hann. „Það endaði með því að við fengum mjög margar brotnar styttur hingað heim."

Fulltrúar flutningafyrirtækisins brugðust skjótt við þegar Hilmar og félagar létu þá vita af hrakförum Eddanna og hefur þeim verið komið undir læknishendur.

„Það er ágætur þúsundþjalasmiður hérna í borginni sem tekur að sér að koma þeim í nothæft ástand," segir Hilmar. „Hann áætlar að hann verði búinn áður en hátíðin fer fram. Þannig að við verðum komnir með allar stytturnar í hús sem verða afhentar 19. febrúar."

Sigurður Jón Ragnarsson hjá ÍSA stáli sér um viðgerðina á styttunum. Hann segir væntanlega verðlaunahafa ekki þurfa að hafa neinar áhyggjur af því að fá ekki stytturnar sínar. „Það er verið að klára þetta. Megnið af styttunum er tilbúið," segir Sigurður.

Er þetta með furðulegri verkefnum sem þú hefur fengið á þitt borð?

„Nei, nei."

Er þetta daglegt brauð?

„Já, já, eitthvað svona? Þetta er ekki neitt neitt. Þetta er ekki flókið verkefni. Það tekur tíma fyrir límið að þorna, en stytturnar verða allar tilbúnar eftir helgi."

Verða þær jafnvel sterkari fyrir vikið?

„Já, sterkari en þær voru í upphafi."

atlifannar@frettabladid.is