John Hurt leikur Alla ríka

„Mín stefna var aldrei að verða þaulsetinn sem forstjóri, hugurinn stefndi alltaf á skapandi greinar,“ segir kvikmyndagerðarmaðurinn Elfar Aðalsteinsson.

Elfar á óvenjulegri feril að baki en margir í hans starfi, hann var forstjóri útgerðarfélagsins Eskju á Eskifirði, sat í stjórn knattspyrnufélagsins Stoke og er barnabarn Alla ríka, eins þekktasta útgerðarmanns í sögu Íslands. Elfar gegndi forstjórastöðu Eskju í fimm ár og flutti síðan með fjölskylduna í sveitaþorp á Bretlandseyjum fyrir um sjö árum. Og hann viðurkennir að sumir sveitungar hans hafi haldið að hann væri klikkaður.

Elfar hefur náð eftirtektarverðum árangri í kvikmyndalistinni. Stuttmyndin Sailcloth, sem skartar sjálfum John Hurt í aðalhlutverki, hefur hlotið verðlaun á kvikmyndahátíðum úti um allan heim og það hefur vakið athygli hvernig óreyndum íslenskum leikstjóra tókst að fá hinn margverðlaunaða og virta Hurt til að leika þögult hlutverk, ein þekktasta rödd kvikmyndasögunnar segir ekki eitt orð. Elfar segir að það þurfi reyndan leikara til að koma slíku hlutverki til skila.

„Ég skrifaði hlutverkið með John í huga og sendi handritið síðan á umboðsskrifstofuna hans. Skömmu seinna fékk ég símhringingu þar sem umboðsmaðurinn tilkynnti mér að Hurt vildi hitta mig á hóteli í Soho. Þannig að hann tók mig í áheyrnarpróf en ekki öfugt. En það gekk nógu vel til að hann tæki hlutverkið að sér,“ útskýrir Elfar.

Sú saga gengur fjöllum hærra fyrir austan að Sailcloth sé að einhverju leyti byggð á Alla ríka. Héraðsfréttablaðið Austurglugginn fjallaði til að mynda um málið fyrir helgi. Þar var haft eftir Elfari að það væru margar persónulegar tilvitnanir í Alla ríka í myndinni en hann vilji eftirláta fólki að finna sínar eigin túlkanir. Í samtali við Fréttablaðið sagði Elfar það að hluta til rétt að persóna Johns Hurt væri byggð á Alla ríka: „Myndin er gerð í minningu hans,“ segir hann.

Elfar rekur framleiðslufyrirtækið Berserk Films og er með tvö handrit í smíðum. Annað þeirra er nútímaútgáfa af Macbeth eftir William Shakespeare. Svo er önnur stuttmynd hans, Subculture, sýnd á kvikmyndahátíðum um allan heim. „Ég er að skoða hvað ég tek mér fyrir hendur næst, hvort það verður hér úti eða heima á Íslandi,“ segir Elfar sem var þó ekki alveg blautur á bak við eyrun þegar leikstjóraferillinn hófst í Bretlandi. Hann var meðal framleiðenda í kvikmyndunum Sveitabrúðkaup eftir Valdísi Óskarsdóttur og Mömmu Gógó eftir Friðrik Þór. „Ég vil helst taka pásu frá framleiðslunni til að einbeita mér að handritaskrifum og leikstjórninni – allavega í bili.“freyrgigja@frettabladid.is