Boðið í afmælisveislur Parísar Hilton

„Það er freistandi að skella sér, en ég er upptekin í skólanum," segir fyrirsætan Lilja Ingibjargardóttir.

Lilju var boðið í afmælisveislu hótelerfingjans Parísar Hilton í New York í gær, en þar fagnaði Hilton 30 ára afmæli sínu ásamt nokkur hundruð nánustu vinum sínum. Hilton lét sér ekki nægja að halda eina veislu, en sú fyrsta var haldin í glæsivillu hennar í Los Angeles í vikunni. Þá hyggst hún halda þriðju veisluna í Las Vegas.

En hvernig kom til að París Hilton bauð Lilju í afmælið sitt?

„Mér er alltaf boðið í öll skemmtilegustu partíin í New York," segir Lilja í léttum dúr. Lilja kynntist París Hilton í Los Angeles árið 2008 og þær hittust nokkrum sinnum í kjölfarið. Þá var henni meðal annars boðið í partí heim til hennar. „Ég held að þetta sé einhver afmælis­vika hjá henni," segir Lilja. „Ef ég ætti nógu mikið af peningum myndi ég líka ferðast um heiminn og halda partí í hverri einustu borg."

Lilja fékk boð í veislurnar á Facebook. Fái maður boð í veislu í gegnum síðuna getur maður stundum séð gestalistann, sem er eflaust forvitnilegur hjá Paris Hilton. Lilja ákvað hins vegar að láta gestalistann eiga sig. „Nei, ég var ekkert að skoða hann. En það eru náttúrulega þessar aðalstjörnur sem mæta."

Lilja er þó á leiðinni til New York í sumar að hitta vini sína, sem eru á leiðinni í afmælisveisluna. Hvöttu þeir Lilju til að breyta flugmiðanum og skella sér út, en hún tók námið fram yfir afmælisveislu hótelerfingjans. „Það verður nóg af partíum í sumar," segir hún kímin að lokum. - afb