Meistarinn og lærlingurinn

Steven Spielberg er hinn eini sanni gullkálfur í Hollywood; hann er galdramaður á hvíta tjaldinu og kann þá list manna best að búa til alvöru poppkorns-kvikmyndir. Kvikmyndin Super 8 verður frumsýnd um helgina í Sambíóunum. Myndin segir frá hópi krakka sem festa á filmu magnaða atburðarás í bandarískum smábæ þegar lest frá ameríska hernum fer út af sporinu og óargadýr utan úr geimnum gengur laust. Aðalhlutverkin eru í höndum ungra og óreyndra leikara, fyrir utan Elle Fanning, sem hefur verið fyrir framan tökuvélarnar nánast allt sitt líf. Af eldri leikurum má kannski einna helst nefna Kyle Chandler sem áhorfendur Skjás eins gætu kannast við úr sjónvarpsþáttunum Friday Night Lights. Leikstjóri myndarinnar er JJ Abrams sem sló fyrst í gegn með sjónvarpsþáttunum sínum Lost. Super 8 gaf honum hins vegar stærsta tækifæri lífs hans þegar hann fékk að vinna með æskuhetjunni sinni; Steven Spielberg. Abrams var níu ára þegar Spielberg gerði Jaws, magnaða hákarlamynd sem sló öll met í aðsókn og gerði hann að einum umtalaðasta leikstjóra Hollywood. Framhaldið þekkja allir, Spielberg reyndist vera töframaður í kvikmyndalistinni og er talinn einn áhrifamesti leikstjóri sem Hollywood hefur alið af sér. Abrams hefur lýst því yfir að kvikmyndir Spielbergs séu ein af meginástæðum þess að hann fór út í kvikmyndagerð, það hafi því verið draumur fyrir hann þegar Spielberg féllst á að framleiða Super 8. Abrams hefur sagt að myndin sé óður til geimverumynda Spielbergs, E.T. og Close Encounters of the Third Kind. Hún skartar glæsilegum tæknibrellum eins og lög gera ráð fyrir í geimverumyndum en Abrams segir Spielberg hvorki hafa veitt sér ráð hvað þær varðar né um söguþráðinn. Hann hafi gefið sér ráð um hvernig ætti að umgangast unga leikara. „Spielberg vildi að ég leyfði krökkunum að notast við textavél þannig að þau þyrftu ekki að kvíða því að gleyma textanum og gætu einbeitt sér að leiknum,“ útskýrir Abrams í samtali við Daily News. Þrjú ár eru nú liðin frá því að Spielberg sat sjálfur í leikstjórastólnum en aðdáendur hans geta farið að hlakka til; það styttist í kvikmynd hans um ævintýri Tinna og leyndardóma einhyrningsins og þá er Spielberg að leggja lokahönd á leikaraliðið í kvikmynd sinni um Abraham Lincoln. Sú verður frumsýnd á næsta ári en það er Óskarsverðlaunahafinn Daniel Day-Lewis sem leikur hinn goðsagnakennda 16. forseta Bandaríkjanna. freyrgigja@frettabladid.is