Havarí fer í frí

„Blóm og kransar afþakkaðir, við munum koma aftur sko,“ segja aðstandendur Havarí en verslunin flytur úr húsnæði sínu í Austurstræti á morgun.

Í tilefni af síðasta opnunardegi verður mikið húllúmhæ, glens og grín. Búðinni verður formlega lokað með stórtónleikum FM Belfast og Prinspóló klukkan 16 en þessar hljómsveitir eru tengdar versluninni órjúfanlegum böndum.

„Útsalan verður að sjálfsögðu á blússandi siglingu og hægt verður að gera góðan díl á músík, fatnaði, listaverkum, bókum og öllu tilheyrandi. Havarí mun svo taka sér smá vetrarfrí en koma tvíelft til baka á vormánuðum á nýjum stað í miðborg Reykjavíkur og halda áfram að veita menningarlega afþreyingu af flestu tagi,“ segir í tilkynningu.

Havarí verður áfram starfrækt á vefsíðunni havari.is og stefnir á að vera með rafrænar uppákomur þar. Þá verða reglulega haldin Havaríkvöld víðsvegar um borgina þar til við finnum þak yfir höfuð okkar og annarra.