Dönsk kona mætir á sjöundu Eve-hátíðina sína

„Ég er nörd og mjög stolt af því," segir danski forritarinn Gitte Karpinski, þaulreyndur spilari íslenska tölvuleiksins EVE Online.

Tölvuleikjaframleiðandinn CCP heldur sjöundu aðdáendahátíð EVE Online helgina 24. til 26. mars. Hin 27 ára gamla Gitte hefur mætt á allar hátíðirnar og mætir að sjálfsögðu í ár, en hún spilar leikinn í um tvo tíma á dag. En hvað er svona merkilegt við þessa hátíð?

„Maður fær tækifæri til að hitta alla á hátíðinni," segir Gitte. „Allir sem spila leikinn eru á sömu blaðsíðunni og tala um sömu hneykslin og viðburði. Fólk sem stundar reiðmennsku hefur alltaf eitthvað að tala um. Það er eins með leikinn. Allir eru á sama stað og sömu hlutirnir gerast hjá öllum."

Í EVE Online stíga spilarar inn í sýndarheim í geimnum. Meira en 360.000 manns um allan heim spila leikinn, sem nýtur vaxandi vinsælda. „Maður eignast vini og óvini í leiknum. Svo mætir maður á hátíðina og hittir einhvern sem maður hefur barist við og fær sér bjór með honum," segir Gitte.

Þrátt fyrir að fólk takist á í sýndar­heiminum hefur Gitte ekki orðið vör við reiða spilara á aðdáendahátíðunum. „En það er fólk sem maður veit að maður á eftir að kunna illa við," segir hún. „Í flestum tilvikum er góður andi í fólki - ég get hatað einhvern í leiknum en þegar ég hitti manneskjuna gerum við grín hvor að annarri og fáum okkur bjór saman. Ég hef ekki ennþá séð fólk slást vegna einhvers sem gerðist í leiknum. Það er mjög fyndið að sjá erkióvini í leiknum detta í það saman þegar þeir hittast."

Gitte kemur ásamt hópi danskra spilara til landsins, en búast má við að hundruð erlendra spilara sæki hátíðina ásamt blaðamönnum og bransafólki. Sjálf ferðast Gitte reglulega um heiminn og hittir aðra spilara.

En hvað finnst fjölskyldunni um áhugamálið?

„Fjölskyldan mín skilur ekki leikinn, en þau hafa alltaf vitað að ég er frekar sérstök og ekki mjög stelpuleg," segir Gitte létt. „Ég hef alltaf verið mikið fyrir tölvur og leiki. Þau eru búin að átta sig á því að ég spila á leik á netinu á meðan aðrir fara til dæmis á hestbak."

atlifannar@frettabladid.is