Magnús og Jóhann snúa aftur

„Við skriðum upp úr kjallaranum hjá Jóhanni fyrir fjörutíu árum,“ segir tónlistarmaðurinn Magnús Þór Sigmundsson.

Hann og Jóhann Helgason, sem skipuðu dúettinn Magnús og Jóhann og voru saman í hljómsveitinni Change, ætla að gefa út ferilsplötu í vor og halda tónleika í tilefni af fjörutíu ára samstarfi sínu. Á meðal vinsælustu laga þeirra eru Ástin og lífið, Blue Jean Queen og Sú ást er heit.

Þeir ætla í hljóðver á sunnudaginn þar sem sex til átta lög verða hljóðrituð og að minnsta kosti tvö þeirra verða glæný. Einnig verða endurvakin eldri lög sem aðrir flytjendur hafa gert þekkt, þar á meðal Seinna meir sem hljómsveitin Start flutti á sínum tíma.

„Þetta leggst mjög vel í mig. Það er alltaf gaman að hitta Jóhann á þessum nótum,“ segir Magnús Þór. Langt er síðan þeir tveir tóku upp efni saman. Síðast kom út tónleikaplata frá þeim í tilefni af tuttugu ára samstarfsafmæli þeirra. Leiðir þeirra hafa þó legið saman með reglulegu millibili, þar á meðal á menningarnótt fyrir tveimur árum.

Fjörutíu lög verða á nýju plötunni, eitt fyrir hvert ár, og tónleikar í Austurbæ eru fyrirhugaðir í maí.

En kemur ekki til greina að endurvekja Change? „Nei, það verður ekki gert. Þá þyrfti ég að fara í Hagkaup og kaupa mér raddbönd. Það var allt sungið einhvers staðar uppi í skýjunum,“ segir Magnús Þór hress. - fb